Фанаты “Дынама” хочуць “беларусізаваць” клуб. На тэлебачанні разважаюць пра цяжкасці перакладу і чакаюць, калі па-беларуску загучыць "Мінск-Арэна".
Прыхільнікі хакейнага клуба “Дынама-Мінск” заклікалі каментатараў і дыктараў суправаджаць хатнія матчы каманды па-беларуску. Пад петыцыяй на раніцу аўторка падпісалася больш за 1000 фанатаў. У самім клубе кажуць, што такая ініцыятыва стала нечаканасцю.
“Гэта ініцыятыва заўзятараў, адпаведна мы яе ўбачылі на сайце, дзе збіраюцца петыцыі. Будзем сачыць за развіццём падзей”, – распавялі ў прэс-службе каманды.
Афіцыйны фан-клуб “Дынама” з такой прапановай не выступаў, але цалкам падтрымлівае такую “стыхійную” акцыю.
“Асабіста сам лічу, што ідэя, у прынцыпе, нядрэнная, – кажа кіраўнік фан-клуба “Byzone” Андрэй Марковіч. – У прынцыпе, яна можа быць рэалізавана. Суправаджэнне дыджэйскае, як разумею, гэта каб беларуская музыка гучала на арэне. Ну і суддзя-інфарматар можа гаварыць па-беларуску”.
Намеснік дырэктара галоўнай дырэкцыі спартовага вяшчання Белтэлерадыёкампаніі Аляксандр Казюкевіч кажа, што трансляцыі на беларускай мове цалкам магчымыя. Але спачатку прапануе дачакацца моманту, калі клуб зможа перавесці гукавое суправаджэнне на арэне на мову.
Аляксандр Казюкевіч: “Калі ўсё атрымаецца, то другім крокам можна будзе разглядаць трансляцыю на беларускай мове. Плюс - будзе не зусім правільна выглядаць, калі каментатар у кадры будзе задаваць пытанне на беларускай, а потым перакладаць таму, у каго пытаецца, на рускую мову”.
Свой подпіс пад петыцыяй паставіў адзін з лідэраў прадпрымальніцкага руху Анатоль Шумчанка. Ён не прапускае хатнія матчы “Дынама” і лічыць сябе вялікім прыхільнікам сталічнага клуба.
Анатоль Шумчанка: “На матчы чуваць толькі дзве мовы: рускую і англійскую. Руская – калі паведамляюць, англійская – калі граюць застаўкі. Гэта ненармальна!”
Адзін з аўтараў “дынамаўскага” гімна Алег Хаменка да ініцыятывы фанатаў ставіцца станоўча і раіць рабіць усё якасна ды паступова.
Алег Хаменка: “Я пра гэта нешта чуў. Я лічу, што тэрмінова і адразу ўсё рабіць непатрэбна. Але тое, што гэта рабіць вельмі важна і што гэта было б вельмі неабходна, калі рабіць якасна і паступова, я б вось на гэтым настойваў”, - перадае Еўрарадыё.
